“تناتيش الحُبّ”..أحدث إبداعات الشاعر أحمد بيضون

ويتواصل اللقاء مع المعين الصافي لإبداعات وإطلالات أدباء ومواهب أرض الكنانة..

وعبر هذه السطور تنشر بوابة “الجمهورية والمساء أون لاين” أحدث إبداعات الشاعر أحمد فاروق بيضون تحت عنوان “تناتيش الحُبّ”.

????

(تناتيش الحُبّ)

الفاضي يعمل قاضي وانتِ ماتتراضي
يادوب في ساعة شوق، مالسُّهد أنا عادي
حبيت فوسْط الحور، حوريه مالوادي
عديت بلاد وعباد وقلت أنا راضي
وركبت موج البحر فالريح أنا ماضي
ولما وصلت لحدك ودخلت بيت القاضي
صرختله :انجدني ردّ عليَ وقال
هو أنا فاضي
ارحمني مالمِشوار لقلبي مكنش فالفاضي
وأخدت في النّواح :ارحمني يا قاضي
يفيد بإيه تصدِّني وآخد في إعراضي
طيّب بخاطري وقالي دي مهرهاأراضي
قلتله المَهر مش أرضى وأنا هرميلك بياضي
جيت امسك السكّين :
انزعلَها قلبي ياحضرة القاضي
قالي بقولك إرضَ، قلبك دي شيء عادي
بس انت من الفرسان؛ هجبها هنا قصادي
قلتلها قلبي خُديه ده مهرك؛ يمكن تتراضي
ردت علىّ بصوت كالبُلبل الشادي:
سلِّمت روحي ليك، بالإذن ياقاضي
آدي حكاية واحد في الحب كان راضي
إلوقتي حابب أقول للحبايب.. ده كلُّه كان ماضي.

اللي مقلهوش حُبي.. ليكي
إني عَالعهد.. مش ناسيكي
ولو في يوم الزمان غدر بيكي
هتلاقيني واقف قصادك.. بناديكي
ولو بناقص مني خالص.. ده يرضيكي
باقي عالحلو اللي بينا
ساقتيني المرّ بإيديكي
باقي العشرة اللي زاحت
سور وراه سور. بيعاديكي
باقي عاللي باقي مني
وانتِ برضه مش كافيكي
واللي باقي يادوب خِصام
والخلاص كلمة.. حبيبي
بسّ لو عادت سنين
كنت أفكر ألف مره… أشتكيكي
أشكِي على إيه ولا إيه
ضحكة الأيام إليكي
وفشقاوتي جرح غامق
ينتهي بنظرة عينيكي
لو دواي يهون عليكي
نادي عالغلبان يجيكي….

إنتِ أي واحده فيهم
إنتي هيَّ المفتريّه
واللي بتعشق القسيّه
ولاّ هيَّ المدّاريه
اللي راسمَه صفو نيَّه
ولا ديّه اللي قادره
واللي سايقه فالمكابره
وفهواها عاشقه غادره
قوليلي انت مين يا نادرَه
إنت هي اللي صبوره
وبتشيل الهموم ومسؤوله

*******
إنت أي واحدة….
أم ضهر نتسند عليه ورجُوله
واللي فاهمه الدنيا صح
تعيشها بلقمَه وفولَه
يبقى انت حلم كان من الطفولة
واللي قلبي هواها
وسكته كانت طويله
بس فيه ناس كتير مغلوله
اللي زيك عمله نادره
والسما والأرض شاهده
إنك انت اللي هويتك
من غير كلام ولا كرت مُعايده
انت بنت أصول بجد
عود وسند وقوام يتشد
وفجمالك مشفتش حد
عاوز كلمة :حاضر تكون الردّ.

ظهرت المقالة “تناتيش الحُبّ”..أحدث إبداعات الشاعر أحمد بيضون أولاً على جريدة المساء.